ថ្ងៃទី៣ ខែធ្នូ ឆ្នាំ២០២៤ មន្ត្រីសម្រុះសម្រួលដោះស្រាយវិវាទនៃ អ.ដ.ក. រួមមាន លោក ឡាយ អូន, លោកស្រី ជូ វិនាថ និងលោក ហ៊ូ ប៊ុនណន បានសម្រុះសម្រួលផ្សះផ្សាបញ្ចប់វិវាទពាក់ព័ន្ធនឹងកិច្ចសន្យាទិញលក់អចលនវត្ថុ ដែលអូសបន្លាយអស់រយៈពេលជាង ៧ ឆ្នាំ តាមពាក្យស្នើសុំរបស់គូភាគីទាំងសង្ខាង។

សំណុំរឿងវិវាទនេះ បានកើតឡើងតាំងពីដេីមឆ្នាំ២០១៧ ដោយផ្តេីមចេញពីការបានខកខានក្នុងការអនុវត្តតាមកាតព្វកិច្ចនៃកិច្ចព្រមព្រៀងទិញលក់អចលនវត្ថុមួយកន្លែង មានទីតាំងស្ថិតនៅក្នុងខេត្តកំពង់ស្ពឺ។ កន្លងមក គូភាគីបានស្វែងរកដំណោះស្រាយតាមផ្លូវតុលាការ និងស្ថាប័នមានសមត្ថកិច្ចផ្សេងទៀត តែមិនទាន់ទទួលបានដំណោះស្រាយនៅឡេីយ។ ដោយមិនចង់ឲ្យវិវាទបន្តវែងឆ្ងាយ​ និងចង់ស្វែងរកដំណោះស្រាយមួយដោយសន្តិវិធី ទើបនៅកំឡុងខែវិច្ឆិកា ឆ្នាំ២០២៤ គូភាគីទាំងសង្ខាងបានស្ម័គ្រចិត្តនាំយកវិវាទរបស់ខ្លួនមកដោះស្រាយនៅ អាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) ដើម្បីធ្វេីការសម្រុះសម្រួលផ្សះផ្សាបញ្ចប់វិវាទជាស្ថាពរ។

គូភាគីវិវាទ បានផ្តិតមេដៃលើកំណត់ហេតុព្រមព្រៀងបញ្ចប់វិវាទ ដែលផ្អែកតាមច្បាប់ កំណត់ហេតុនេះមានអានុភាពអនុវត្តដូចសាលក្រមស្ថាពររបស់តុលាការដែរ។